سلام يسوع لكل اللى فى المنتدى
انا يا جماعة جديد فى المنتدى و بصراحة انا اصلا دخلت عشان اعرض مشكلتى يمكن تكون دى بداية جديدة لى فى طريق يسوع ...انا و باختصار طول عمرى بعيد عن الكنيسة يعنى عمرى ما رحت مدارس احد ولا اى اجتماعات فى حياتى كلها و معرفش اى حاجة عن الكنيسة غير انى بروح اعترف كل فترة و احضر قداس برده كل فترة و خلصت على كدة...انا عندى دلوقتى 21سنة فى تالتة كلية و نفسى نفسى نفسى اكون زيوكو يعنى خادم و شماس و احضر اجتماعات و يكون لى ارتباط قوى بالكنيسة لكن المشكلة فى الاتى:-
1-معرفش اى حاجة دينية لا فى الانجيل ولا الالحان و لا قبطى ولا قديسين
2-مليش اى اصحاب من اى كنيسة
3-بحس بغربة شديدة و وحدة شديدة اذا حبيت اقعد فى الكنيسة شوية بعدد القداس مثلا بحس الجو دة غريب جدا و ببقى عامل زى اليتيم لوحدى فبمشى مباشرة
4-اخدم ازاى وانا عمرى ما اتخدمت يعنى (فاقد الشىء لا يعطيه)
**انا نفسى اكون حاجة تانية خالص غير كدة يعنى نفسى تبقى الكنيسة فعلا هى بيتى التانى و احس فيها بالراحة و الدفء و الامان**يا ريت اللى هيرد يحاول يحط نفسه مكانى و يفكر كان هيتصرف ازاى و يقوللى كلام و خطوات عملية اقدر انفذها عشان اتغير مع مراعاة انو مايبقاش كلام خيالى زى (روح احضر اجتماعات وواحدة واحدة هتتعرف عالناس و هتبقى الدنيا تمام) لا مينفعش انا محتاج حد يقوللى تفاصيل
معلش طولت عليكو بس انا حبيت اعرض المشكلة بافضل صورة واتمنى اجد يد العون

كله بيدخل يقرا ويطلع مفيش ولا كومنت واحد ههههههههههه

يا عم منمن إنت بتغني وترد على نفسك فقد ذكرت (((أنا نفسى اكون حاجة تانية خالص غير كدة يعنى نفسى تبقى الكنيسة فعلا هى بيتى التانى و احس فيها بالراحة و الدفء و الامان**يا ريت اللى هيرد يحاول يحط نفسه مكانى و يفكر كان هيتصرف ازاى و يقوللى كلام و خطوات عملية اقدر انفذها عشان اتغير مع مراعاة انو مايبقاش كلام خيالى زى (روح احضر اجتماعات وواحدة واحدة هتتعرف عالناس و هتبقى الدنيا تمام) لا مينفعش انا محتاج حد يقوللى تفاصيل))) ماهو الرد انت رديته على نفسك .. روح الكنيسة واحضر الاجتماعات واتعرف على الناس وروح اعترف واتناول .. وحتلاقي الدنيا تمام على حد قولك .. يعني كن اجتماعي يا اخي

بص يا سيدى انت منورنا فى القسم وفى المنتدى عموما

ابدا الاول بالصلاة

كلمه الاول وقوله بجد محتاجلك اوى

ثانيا انت قولت عايز اتغير

ودى لوحدها كلمة جامدة اوى

يبقى هتتغير


ثالثا ابدا بالرحلات اطلع دى هتقربك للناس اكتر



مع راى استاذ عماد وتكمل



يارب اكون افادتك

اولا انا بشكرك يا استاذ عماد وبشكرك يا ارار
ثانيا انا متاكد ان مش انا الوحيد اللى ف الوضع اللى انا حكيته اكيد فيه زيى كتير بس مش بيبينو نفسهم او محبطين او استسلمو لوضعهم او اتاقلمو انهم يبقو بعيد عن الكنيسة
ثالثا يا استاذ عماد اروح اجتماعات ازاى و الدنيا كلها شلل وجروبات يعنى عمرى مهروح افرض نفسى على حد وانا مش بغنى على فكرة وحلو جدا ان انا اتكلمت عن نفسى بصراحة و لو فيه اى قسيس او خادم انجيلى قرا الكلام دة مكنش هداله بال غير لما يعرف انا مين و يقربنى للكنيسة بطريقته و يتابعنى لحل اما اندمج عالجو الجديد اللى معشتهوش قبل كدة لان هى دى الخدمة مش بس خدمة مدارس الاحد انما خدمة الخروف الضال اللى محدش بيسال عنه....انا اسهلى انى اروح اى كنيسة انجيلية لانهم بيعرفو يحتووا الانسان المجروح لكن انا مش عايزاروح عندهم و ربنا يتولانى برحمته

اولا شكرآ ليكلانك فتحت قلبك لاخواتك الى هما احنا
ثانيآ بص او لآ علشان تحل اى مشكله لازم تشوف السبب
السب هوا انك انت الى بطلت تروح مدارس الاحد والكنيسه والاجمعات يعنى انت السبب فى كل الى انت في
بس لو انت فعلآ من جواك عاوز ترجع لربنا انت اكيد من نفسك الى هتروح لربنا
عمر ما فى حد فى الدنيا هيزوقكعلى عمل الخير
ارجوك متزعلش من اخوك ايهاب وشكرآ

ألق على الرب همك فهو يعولك
جرب تصلي
جرب تكلم ربنا
جرب تزور بيته
جرب تشارك إخواتك في سماع كلمة ربنا
جرب تكلم إخواتك في المعمودية
جرب تقرب من راعي الكنيسة وتحكيله
جرب تطلع أول سلمة
مش يمكن لما تجرب الحاجات دي تلاقي الموضوع سهل
أخرج الأول من القوقعة الموجودة في دماغك الأول
إنت قاعد تكلم في نفسك وتحبط نفسك بين جدران عقلك
جرب يا أخي مش حتخسر حاجة
وصدقني لو مجربتش حتخسر
كتييييييييييييييييييييييييييييييييييييييييييير

صدقنى فهماك كويس و خصوصا فى موضوع الشلل و الجروبات ده هههههههه
بس صدقنى حاول تقرب من الكنيسة و سيب الباقى على ربنا
و جرب كمان تحكى لكاهن ممكن يقدر يشركك فى أى نشاط من انشطة الكنيسة
يعنى دور على أى حاجة بتعرف تعملها غير الخدمة عن طريق الشرح و الوعظ
مثلا بتحب التصوير التمثيل الكمبيوتر زيارة المرضى خدمة اتوبيسات أى حاجة
هتلاقى نفسك فى قلب الاحداث بالتدريج ههههههههههه
و بالنسبى لحكاية الانجليين دى انا مش معاك مع كل الاحترام ليهم
لسبب بسيط ان هدفنا الاول من روح الكنيسة هو الله حتى لو كانت الخدمة ضعيفة و مفيهاش افتقاد
هوا صحيح شىء محزن لكنه مش مبرر يخلينا نسيب كل حاجة ورانا و نمشى
و قبل كل حاجة اطلب مساعدة ربنا ده مفيش احن منه
سلام

ثالثا يا استاذ عماد اروح اجتماعات ازاى و الدنيا كلها شلل وجروبات يعنى عمرى مهروح افرض نفسى على حد وانا مش بغنى على فكرة وحلو جدا ان انا اتكلمت عن نفسى بصراحة و لو فيه اى قسيس او خادم انجيلى قرا الكلام دة مكنش هداله بال غير لما يعرف انا مين و يقربنى للكنيسة بطريقته و يتابعنى لحل اما اندمج عالجو الجديد اللى معشتهوش قبل كدة لان هى دى الخدمة مش بس خدمة مدارس الاحد انما خدمة الخروف الضال اللى محدش بيسال عنه....انا اسهلى انى اروح اى كنيسة انجيلية لانهم بيعرفو يحتووا الانسان المجروح لكن انا مش عايزاروح عندهم و ربنا يتولانى برحمته

أولاً وقبل كل شئ أهلاً بيك معانا
سهل جداً صدقنى انك تدخل بين الشلل والجروبات دى
على فكرة لأن فيه بعض الكنايس أصلاً بتهتم جداً بالناس الجديدة وبترحب بيها واللى فى دماغك ده كلام من شيطان اليأس علشان يبعدك عن الكنيسة خالص وافتكر انك قبل اى شئ رايح لربنا مش لصحابك

كمان مينفعش تروح كنيسة انجيلية وانت ارثوذوكسي لأن تعاليمهم مختلفة تماماً عننا